اگر آپ سے سوال کیا جائے کہ آپ کچھ کھائے بغیر کتنے دن تک رہ سکتے ہیں؟ تو شاید اس کا جواب ایک یا دو دن سے زیادہ کا نہیں ملے گا۔
لیکن ایران سے تعلق رکھنے والے ایک شخص نے دعویٰ کیا ہے کہ اس نے گزشتہ 17 سال سے کوئی غذا نہیں کھائی۔کیا اس بات پر یقین کیا جاسکتا ہے؟
ایک سوال ضرور ذہن میں آتا ہے کہ اگر اس شخص نے اتنے عرصے تک کچھ کھایا نہیں تو وہ زندہ کیسے ہے؟
غیر ملکی میڈیا رپورٹس کے مطابق ایران سے تعلق رکھنے والے 58 سالہ غلام رضا کا دعویٰ ہے کہ اس نے 2006 میں کھانا کھانا چھوڑ دیا تھا اور تب سے وہ زندہ رہنے کے لیے صرف پانی اور سوڈا ڈرنکس پر انحصار کرتا ہے۔
غلام رضا کا کہنا ہے کہ کھانے کو دیکھنے سے ہی مجھے متلی ہوتی ہے اور پچھلے 17 سال سے میں پانی، سافٹ ڈرنکس جیسے پیپسی اور کوکا کولا پی کر زندہ ہوں۔
رپورٹس کے 2006 میں ایک رات کو غلام رضا کو اپنے منہ میں ایک عجیب احساس ہوا،اس نے کئی ڈاکٹروں کو بھی دکھایا پر اس کے منہ کا ذائقہ تبدیل نہیں ہوا ،آخر کار اس نے فیصلہ کیا کہ اب وہ مستقل طور پر کھانا چھوڑ دے گا اور تب سے صرف پانی اور مشروبات پی کر بالکل نارمل زندگی گزار رہا ہے۔
تفصیلات کے مطابق اس کے گھر والے اس کے سامنے کھانا نہیں کھاتے کیونکہ کھانا دیکھ کر وہ بیمار ہو جاتا ہے، تاہم زندہ رہنے کے لیے اور وہ توانائی کاربونیٹیڈ مشروبات سے حاصل کرتا ہے۔ وہ روزانہ سوڈا کی تین بڑی بوتلیں پیتا ہے اور اس کے بعد اسے بھوک نہیں لگتی۔
غلام رضا نے بتایا کہ 2006 کی ایک رات کو مجھے ایک عجیب سا احساس ہوا، مجھے ایسا لگا جیسے میرے منہ کے اندر کچھ بال ہیں، میں نے محسوس کیا کہ ان بالوں کا ایک حصہ میرے پیٹ کے اندر بھی ہے، مجھے ایسا لگا جیسے میرا دم گھٹ رہا ہے، مجھے نہیں معلوم تھا کہ میں کیا کروں۔ میں واقعی اس کیفیت کو بیان نہیں کرسکتا۔
اس نے کہا کہ ہر ایک نے مجھے مختلف ڈاکٹروں کے پاس جانے کا کہا، میں نے کئی ڈاکٹرز کو چیک بھی کرایا لیکن کوئی بھی میری بیماری کی تشخیص نہ کر سکا۔
غلام رضا کے مطابق میں نے ماہر نفسیات کو بھی دکھایا لیکن وہ بھی میری کچھ خاص مدد نہ کرسکا اس لیے میں نے کھانا کھانا مکمل طور پر چھوڑ دیا اور صرف سوڈا اور پانی پی کر زندگی گزارنے کا فیصلہ کیا۔
ایرانی شخص کا دعویٰ ہے کہ جب سے اس نے سافٹ ڈرنکس پینا شروع کیں تب سے اب تک اس کا 32 کلو وزن کم ہوا جبکہ سے گزشتہ 17 سالوں میں اس کی صحت پر بھی کوئی برا اثر نہیں پڑا۔
58 سالہ غلام رضا سافٹ ڈرنکس کے استعمال سے لاحق خطرات سے پوری طرح آگاہ ہے، اس کا دعویٰ ہے کہ وہ معمول کے مطابق چیک اپ کرواتا ہے ، اس کی اینڈوسکوپی بھی کرائی گئی جس سے مکمل طور پر اس کے صحت مند ہونے کی تصدیق ہوئی ۔
