جنوبی افریقا سے تعلق رکھنے والی خاتون نے شادی کے 4 سال بعد طلاق ہونے پر شادی کا فوٹو شوٹ کرنے والے فوٹو گرافر سے  تصاویر اور ویڈیوز کی مد میں دی گئی رقم واپس مانگ لی۔

لانس رومیو نامی فوٹوگرافر نے ٹوئٹر پر خاتون کے ساتھ اپنی واٹس ایپ پر ہوئی گفتگو کے اسکرین شاٹس  شیئر کیے جوکہ وائرل ہوگئے۔

چیٹ کے اسکرین شاٹ میں خاتون فوٹوگرافر سے کہتی ہیں کہ ‘مجھے نہیں معلوم کہ آپ مجھے اب جانتے ہیں کہ نہیں، آپ نے 2019 میں ڈربن میں میری شادی کے موقع پر میرا فوٹو شوٹ کیا تھا’۔

خاتون نے مزید لکھا کہ ‘ میں اب طلاق یافتہ ہوں، مجھے اور میرے سابق شوہر کو شادی کی تصاویر اور ویڈیوز کی اب ضرورت نہیں ہے،  آپ نے شاندار فوٹوشوٹ کیا تھا لیکن وہ ضائع ہو گئیں کیونکہ اب ہم طلاق یافتہ ہیں۔ تاہم مجھے وہ رقم  واپسی کردیں جو ہم نے آپ کو فوٹو شوٹ کرنے پر ادا کی تھی’۔

رپورٹس کے مطابق پہلے تو فوٹوگرافر نے سوچا کہ یہ ایک مذاق ہے لیکن بعد میں اسے احساس ہوا کہ خاتون واقعی سنجیدہ ہے اور اس نے شادی کے فوٹو شوٹ کی رقم واپس مانگی ہے کیونکہ اب اس کی طلاق ہو چکی ہے۔ تاہم، فوٹوگرافر نے اس کی غیر معمولی درخواست کو مسترد کر دیا۔

فوٹوگرافر کی جانب سے رقم واپسی سے انکار کرنے پر خاتون نے اس معاملے میں وکیل کو شامل کرنے کا فیصلہ کیا تاکہ وہ کم از کم رقم کا 70 فیصد واپس لے سکیں۔

رپورٹس کے مطابق خاتون اور فوٹوگرافر کی چیٹ جب وائرل ہوئی تو یہ پوسٹ خاتون کے سابق شوہر نے بھی دیکھی جس کے بعد انہوں نے فوٹوگرافر سے رابطہ کیا اور خاتون کی جانب سے معافی مانگی۔

دوسری جانب سوشل میڈیا صارفین کی جانب سے بھی خاتون کی اس حرکت پر اس کا کافی مذاق اُڑایا گیا۔